سولاردىڭ ءبىرى – گايدار جولامانوۆ. قۇرىلىس سالاسىندا تابان اۋدارماي وتىز ءۇش جىل ەڭبەك ەتىپ كەلە جاتقان ول – تەك شەبەر مامان عانا ەمەس, ءوزىنىڭ ەڭبەكقورلىعىمەن دە, قاراپايىم قالپىمەن دە قۇرمەتكە يە بولعان ازامات. قازىر ول – BCN Group كومپانياسىندا بريگادير. ونىڭ قاراماعىندا 23 ادام ەڭبەك ەتەدى. ارقايسىسى گايداردىڭ ۇقىپتىلىعى مەن تالاپشىلدىعىنا بوي ۇيرەتكەن ماماندار.
گايدار جولامانوۆ شىعىس قازاقستان وبلىسى, قايىڭدى اۋىلىندا دۇنيەگە كەلگەن. ارناۋلى وقۋ ورنىن تامامداعان سوڭ, اسكەري بورىشىن تەڭىز جاياۋ اسكەرىندە وتەيدى. كەيىن تۋعان اۋىلىنا ورالىپ, مەكتەپتە دەنە شىنىقتىرۋ جانە ەڭبەك پانىنەن وقۋشىلارعا ساباق بەرەدى. بىراق نارىق قىسپاعى, توقىراۋ جىلدارىنداعى جۇمىسسىزدىق پەن قىمباتشىلىق اۋىل مۇعالىمىن وتباسىمەن بىرگە الماتىعا ءجۇر-جۇرلەيدى. قالاعا كەلگەن ازامات تالاي جۇمىستىڭ باسىن شالىپ كورەدى. الايدا بىرتىندەپ قۇرىلىس سالاسىنا دەن قويىپ, سونى ومىرلىك جولىنا اينالدىرادى.
«ۇستازدىق ۇيرەتپەگەندى مۇقتاجدىق ۇيرەتەدى» دەيدى قازاق. قۇرىلىس – بالا كەزدەگى ارمانىم بولماسا دا, تۇرمىستىڭ قاجەتتىلىگى وسى سالاعا الىپ كەلدى. قاراپايىم قۇرىلىسشىنىڭ كومەكشىسى بولىپ باستادىم. جۇمىس قولايىما كەلگەن سوڭ, ورايى دا كەلىستى. ءسويتىپ وتباسىمدى اسىرادىم. ايەلىم, بالا-شاعام ءۇشىن قاجىماي ەڭبەك ەتتىم. رۋحىمدى شيراتتىم. ارتىنشا بۇل جۇمىس وزىمە دە ۇناپ كەتتى. وسىلايشا بۇل ءومىرىمنىڭ ماڭىزدى بولشەگىنە اينالدى», دەيدى كەيىپكەرىمىز.
گايداردىڭ بۇل سالاداعى ءتارتىبى مەن تالاپشىلدىعى كەزدەيسوق قالىپتاسپاعان. ول مۇنىڭ ءبارىن اسكەري قىزمەتپەن بايلانىستىرادى. «اسكەردە جۇرگەندە تارتىپپەن جۇرۋگە داعدىلاندىم. كەيىن ول قابىلەت قۇرىلىس سالاسىندا كورىندى. بالام دا اسكەردە بولعاننان كەيىن, قۇرىلىستا مەنىڭ داعدىلارىمدى ءوز بويىنان كورسەتىپ ءجۇر», دەدى بىلىكتى قۇرىلىسشى.
بۇدان كەيىن كەيىپكەرىمىزدەن قۇرىلىس سالاسىندا ەسكەرەتىن ەڭ ماڭىزدى دۇنيەنىڭ نە ەكەنىن سۇراپ كورىپ ەدىك, ج ۇلىپ العانداي «قاۋىپسىزدىك», دەدى گايدار جولامانوۆ.
«قاتەرلى جاعدايلاردىڭ وننان توعىزى قاۋىپسىزدىك تەحنيكاسىن ساقتاماۋدان شىعادى دەپ ايتۋعا نەگىز بار. قۇرىلىس الاڭىندا ءتارتىپ بولماسا, اپاتتىڭ الدىن الۋ قيىن. سول ءۇشىن قاتالدىق تانىتاتىن ساتتەر بولادى. بىراق ءبارى جۇمىسشىلاردىڭ اماندىعى ءۇشىن», دەپ ءتۇسىندىردى ول.
گايدار جولامانوۆتىڭ 23 جاستاعى ۇلى تيمۋر دا قۇرىلىس سالاسىندا. بالا كۇنىنەن اكەسىنىڭ جانىندا ءجۇرىپ وسكەن ول دا تەڭىز جاياۋ اسكەرىندە قىزمەت ەتىپ, كەيىن قۇرىلىسقا ءبىرجولا بەت بۇرعان. قازىر اكەسىنىڭ جولىن قۋىپ, تاجىريبەسىن يگەرىپ كەلەدى.
سويتسەك, بۇل وتباسىداعى قۇرىلىسقا دەگەن ىقىلاس تەك اكە مەن ۇلعا عانا ءتان ەمەس ەكەن. گايداردىڭ جارى ەلەنا كالياكبەروۆا دا ۇزاق جىلدار بويى سىلاقشى بولىپ ەڭبەك ەتكەن. قازىر بالا كۇتىمىنە بايلانىستى دەمالىستا. ءبىر قىزىعى – اكەسى, اناسى, بالاسى – ۇشەۋى كەيدە ءبىر قۇرىلىس نىسانىندا قاتار جۇمىس ىستەيتىن بولعان. ءبىز ءازىل-شىنىمىزدى ارالاستىرىپ: «اعا, قۇرىلىس جۇيكەنى جۇقارتاتىن سالا. جۇمىس بارىسىندا بايقاماي ايەلىڭىزگە نە بالاڭىزعا بريگادير بولىپ ۇرسىپ قويمايسىز با؟» دەپ سۇراعانىمىزدا, كەيىپكەرىمىز ك ۇلىپ:
«ونداي دا بولعان. قۇرىلىس ساناعا سالماق, جۇيكەگە جۇك تۇسىرەتىن جۇمىس قوي. بىراق ۇيگە جەتكەندە ءبارى ۇمىتىلادى», دەدى.
سونىمەن قاتار گايدار جولامانوۆ قۇرىلىس سالاسىنداعى قازىرگى جاعدايدى دا اشىق ايتىپ وتىر. ونىڭ سوزىنشە, جاستار بۇل سالاعا كوپتەپ كەلىپ جاتقانىمەن, كوبى بۇعان ۋاقىتشا جۇمىس رەتىندە عانا قارايدى.
ء«بىراز جاس جىگىتتەر قۇرىلىسقا تابىس ءۇشىن عانا كەلەدى. سەبەبى, ءوسۋ باسپالداعى ءالى جەتىلە قويعان جوق. قۇرىلىسشىلاردىڭ وزدەرى سالاتىن ۇيدەن وزدەرىنە دە پاتەر بۇيىرسا, نۇر ۇستىنە نۇر. سوندا ەڭبەككە دەگەن ىقىلاس ارتادى, ناتيجە دە جوعارى بولادى», دەيدى ول.
ءيا, قۇرىلىس – جاي عانا ماماندىق ەمەس. ول – ءومىر سالتى, جاۋاپكەرشىلىك پەن تاباندىلىقتىڭ ۇيلەسىمى. گايدار جولامانوۆتىڭ اۋلەتى – وسىنىڭ دالەلى. اتادان بالاعا جالعاسقان ەڭبەك, ءبىر وتباسىنىڭ عانا ەمەس, تۇتاس قوعامنىڭ وركەندەۋىنە قىزمەت ەتىپ كەلەدى. قيىندىعى كوپ بولعانىمەن, ادامعا باسپانا, ەلگە كەلبەت سىيلايتىن بۇل سالادا ىقىلاسپەن ەڭبەك ەتىپ جۇرگەن جاندار قاشاندا قۇرمەتكە قۇرمەتكە لايىق.
